Sir 24

1 ⲧⲥⲟⲫⲓⲁ ⲛⲁⲥⲙⲟⲩ ⲉⲧⲉⲥⲯⲩⲭⲏ ⲥⲛⲁϣⲟⲩϣⲟⲩ ⲙⲙⲟⲥ ϩⲛ ⲧⲙⲏⲧⲉ ⲙⲡⲉⲥⲗⲁⲟⲥ 2 ⲥⲛⲁⲟⲩⲱⲛ ⲛⲣⲱⲥ ϩⲛ ⲧⲉⲕⲕⲗⲏⲥⲓⲁ ⲙⲡⲉⲧϫⲟⲥⲉ ⲛⲥϣⲟⲩϣⲟⲩ ⲙⲙⲟⲥ ⲙⲡⲉⲙⲧⲟ ⲉⲃⲟⲗ ⲛⲛⲉϥϭⲟⲙ 3 ϫⲉ ⲁⲛⲟⲕ ⲛⲧⲁⲓⲉⲓ ⲉⲃⲟⲗ ϩⲛ ⲣⲱϥ ⲙⲡⲉⲧϫⲟⲥⲉ ⲁⲩⲱ ⲁⲓϩⲃⲥⲡⲕⲁϩ ⲛⲑⲉ ⲛⲟⲩⲛⲓϥ 4 ⲁⲛⲟⲕ ⲁⲓⲟⲩⲱϩ ϩⲛ ⲛⲉⲧϫⲟⲥⲉ ⲁⲩⲱ ⲉⲣⲉⲡⲁⲑⲣⲟⲛⲟⲥ ϩⲛ ⲟⲩⲥⲧⲩⲗⲟⲥ ⲛⲕⲗⲟⲟⲗⲉ 5 ⲁⲓⲕⲱⲧⲉ ⲉⲡⲕⲱⲧⲉ ⲛⲧⲡⲉ ⲙⲁⲩⲁⲁⲧ ⲁⲓⲙⲟⲟϣⲉ ϩⲙ ⲡϣⲓⲕ ⲛⲛⲛⲟⲩⲛ 6 ϩⲛ ⲛϩⲟⲉⲓⲙ ⲛⲑⲁⲗⲁⲥⲥⲁ ⲙⲛ ⲡⲕⲁϩ ⲧⲏⲣϥ ⲁⲓⲕⲱ ⲛⲁⲓ ϩⲛ ⲗⲁⲟⲥ ⲛⲓⲙ ⲙⲛ ϩⲉⲑⲛⲟⲥ ⲛⲓⲙ 7 ⲁⲓϣⲓⲛⲉ ⲛⲥⲁ ⲟⲩⲱϩ ⲛⲙⲙⲁⲩ ⲧⲏⲣⲟⲩ ⲉⲓⲛⲁⲟⲩⲱϩ ϩⲛ ⲧⲉⲕⲗⲏⲣⲟⲛⲟⲙⲓⲁ ⲛⲛⲓⲙ 8 ⲧⲟⲧⲉ ⲁϥϩⲱⲛ ⲉⲧⲟⲟⲧ ⲛϭⲓ ⲡⲣⲉϥⲥⲱⲛⲧ ⲛⲛⲕⲁ ⲛⲓⲙ ⲁⲩⲱ ⲡⲉⲛⲧⲁϥⲥⲟⲛⲧⲧ ⲁϥⲥⲙⲓⲛⲉ ⲙⲡⲙⲁ ⲛϣⲱⲡⲉ ⲁϥϫⲟⲟⲥ ⲛⲁⲓ ϫⲉ ⲟⲩⲱϩ ϩⲛ ⲓⲁⲕⲱⲃ ⲁⲩⲱ ϫⲓⲕⲗⲏⲣⲟⲛⲟⲙⲓⲁ ϩⲙ ⲡⲓ︤ⲏ︦ⲗ︥ 9 ϩⲁⲑⲏ ⲛⲉⲛⲉϩ ⲁϥⲥⲟⲛⲧⲧ ϫⲓⲛ ⲛϣⲟⲣⲡ ⲁⲩⲱ ⲛϯⲛⲁⲱϫⲛ ⲁⲛ ⲛϣⲁⲉⲛⲉϩ 10 ⲁⲓϣⲙϣⲉ ϩⲛ ⲧⲉⲥⲕⲏⲛⲏ ⲉⲧⲟⲩⲁⲁⲃ ⲙⲡⲉϥⲙⲧⲟ ⲉⲃⲟⲗ ⲁⲩⲱ ⲧⲁⲓ ⲧⲉ ⲑⲉ ⲛⲧⲁϥⲧⲁϫⲣⲟⲓ ϩⲛ ⲥⲓⲱⲛ 11 ⲁϥⲧⲣⲁⲟⲩⲱϩ ϩⲛ ⲧⲉϥⲡⲟⲗⲓⲥ ⲙⲙⲉⲣⲓⲧ ⲁⲩⲱ ⲉⲣⲉⲧⲁⲉⲝⲟⲩⲥⲓⲁ ϩⲛ ⲑⲓ︤ⲗ︦ⲏ︦ⲙ︥ 12 ⲁⲓϫⲉⲛⲟⲩⲛⲉ ⲉⲃⲟⲗ ϩⲙ ⲡⲗⲁⲟⲥ ⲉⲧⲧⲁⲓⲏⲩ ϩⲛ ⲧⲙⲉⲣⲓⲥ ⲛⲧⲉⲕⲗⲏⲣⲟⲛⲟⲙⲓⲁ ⲙⲡϫⲟⲓⲥ 13 ⲁⲓϫⲓⲥⲉ ⲛⲑⲉ ⲛⲛⲓⲕⲉⲇⲣⲟⲥ ⲉⲧϩⲛ ⲡⲗⲓⲃⲁⲛⲟⲥ ⲁⲩⲱ ⲛⲑⲉ ⲛⲛⲓⲕⲩⲡⲁⲣⲓⲥⲥⲟⲥ ⲉⲧϩⲛ ⲛⲧⲟⲟⲩ ⲛⲛⲁⲉⲣⲙⲱⲛ 14 ⲁⲓϫⲓⲥⲉ ⲛⲑⲉ ⲛⲛⲓⲃⲛⲛⲉ ⲉⲧϩⲛ ⲛⲉⲕⲣⲱⲟⲩ ⲁⲩⲱ ⲛⲑⲉ ⲛⲛⲓϣⲉ ⲛⲛⲓⲟⲩⲣⲧ ⲉⲧϩⲛ ϩⲓⲉⲣⲓⲭⲱ ⲁⲩⲱ ⲛⲑⲉ ⲛⲟⲩⲃⲱ ⲛϫⲟⲉⲓⲧ ⲉⲛⲉⲥⲱⲥ ϩⲛ ⲧⲥⲱϣⲉ ⲁⲓϫⲓⲥⲉ ⲛⲑⲉ ⲛⲟⲩⲡⲗⲁⲧⲁⲛⲟⲥ 15 ⲁⲩⲱ ⲛⲑⲉ ⲛⲟⲩϭⲓⲛⲁⲙⲱⲙⲟⲛ ⲁⲩⲱ ⲟⲩϣⲉ ⲛⲥⲱⲧϥ ⲙⲛ ⲟⲩⲁⲥⲡⲁⲗⲁⲑⲟⲥ ⲛⲁⲣⲱⲙⲁⲧⲁ ⲁⲓϯ ⲙⲡⲁⲥⲧⲟⲓ ⲁⲩⲱ ⲛⲑⲉ ⲛⲟⲩⲭⲁⲗⲃⲁⲛⲏ ⲙⲛ ⲟⲩⲉⲓⲃ ⲙⲛ ⲟⲩⲥⲧⲁⲕⲧⲏ ⲁⲩⲱ ⲛⲑⲉ ⲛⲟⲩⲗϩⲱⲃ ⲛⲗⲓⲃⲁⲛⲟⲥ ϩⲛ ⲟⲩⲥⲕⲏⲛⲏ 16 ⲁⲛⲟⲕ ⲁⲓⲡeⲣϣⲛⲁⲕⲗⲁⲇⲟⲥ ⲉⲃⲟⲗ ⲛⲑ[ⲉ ⲛ]ⲟⲩⲧⲉⲣⲉⲃⲓⲛⲑⲟⲥ ⲁⲩⲱ ⲛⲁⲕⲗⲁⲇⲟⲥ ϩⲛⲕⲗⲁⲇⲟⲥ ⲛⲉⲟⲟⲩ ⲛⲉ ϩⲓ ⲭⲁⲣⲓⲥ 17 ⲁⲛⲟⲕ ⲁⲓϯⲟⲩⲱ ⲛⲧⲉⲭⲁⲣⲓⲥ ⲛⲑⲉ ⲛⲟⲩⲃⲱ ⲛⲉⲗⲟⲟⲗⲉ ⲁⲩⲱ ⲛⲁϯⲟⲩⲱ ϩⲉⲛⲕⲁⲣⲡⲟⲥ ⲛⲉⲟⲟⲩ ⲛⲉ ϩⲓ ⲙⲛⲧⲣⲙⲙⲁⲟ 18 19 ⲛⲉⲧⲉⲡⲓⲑⲩⲙⲓ ⲉⲣⲟⲓ ϯⲡⲉⲧⲛⲟⲩⲟⲓ ⲉⲣⲟⲓ ⲛⲧⲉⲧⲛⲥⲉⲓ ⲉⲃⲟⲗ ϩⲛ ⲛⲁϭⲣⲱϭ 20 ⲡⲁⲣⲡⲙⲉⲉⲩⲉ ⲅⲁⲣ ϩⲟⲗϭ ⲉϩⲟⲩⲟ ⲉⲡⲉⲃⲓⲱ ⲁⲩⲱ ⲧⲁⲕⲗⲏⲣⲟⲛⲟⲙⲓⲁ ⲉϩⲟⲩⲟ ⲉⲡⲉⲃⲓⲱ ⲙⲡⲙⲟⲩⲗϩ 21 ⲛⲉⲧⲟⲩⲱⲙ ⲙⲙⲟⲓ ⲥⲉⲛⲁϩⲕⲟ ⲙⲙⲟⲓ ⲟⲛ ⲁⲩⲱ ⲛⲉⲧⲥⲱ ⲙⲙⲟⲓ ⲥⲉⲛⲁⲉⲓⲃⲉ ⲙⲙⲟⲓ ⲟⲛ 22 ⲡⲉⲧⲥⲱⲧⲙ ⲉⲣⲟⲓ ϥⲛⲁϫⲓϣⲓⲡⲉ ⲁⲛ ⲁⲩⲱ ⲛⲉⲧⲣϩⲱⲃ ⲛϩⲏⲧ ⲛⲛⲉⲩⲣⲛⲟⲃⲉ 23 ⲛⲁⲓ ⲧⲏⲣⲟⲩ ⲡϫⲱⲱⲙⲉ ⲡⲉ ⲛⲧⲇⲓⲁⲑⲏⲕⲏ ⲙⲡⲛⲟⲩⲧⲉ ⲉⲧϫⲟⲥⲉ ⲡⲛⲟⲙⲟⲥ ⲡⲉ ⲛⲧⲁⲙⲱⲩⲥⲏⲥ ϩⲟⲛϥ ⲉⲧⲟⲟⲧⲛ ⲛⲕⲗⲏⲣⲟⲛⲟⲙⲓⲁ ⲛⲛⲥⲩⲛⲁⲅⲱⲅⲏ ⲛⲓⲁⲕⲱⲃ 24 25 ⲡⲉⲧⲙⲟⲩϩ ⲛⲑⲉ ⲙⲫⲉⲓⲥⲱⲛ ϩⲛ ⲧⲥⲟⲫⲓⲁ ⲁⲩⲱ ⲛⲑⲉ ⲛⲧⲓⲅⲣⲓⲥ ϩⲛ ⲛⲉϩⲟⲟⲩ ⲃⲃⲣⲣⲉ 26 ⲡⲉⲧⲙⲟⲩϩ ϩⲛ ⲧⲙⲛⲧⲣⲙⲛϩⲏⲧ ⲛⲑⲉ ⲙ[ⲡⲉⲩ]ⲫⲣⲁⲧⲏⲥ ⲁⲩⲱ ⲛⲑⲉ ⲙⲡⲓⲟⲣⲇⲁⲛⲏⲥ ϩ[ⲛ ⲛ]ⲉϩⲟⲟⲩ ⲙⲡⲱϩⲥ 27 ⲡⲉⲧⲟⲩⲱⲛϩ ⲉⲃⲟⲗ ⲛⲧⲉⲥⲃ[ⲱ ⲛ]ⲑⲉ ⲙⲡⲟⲩⲟⲉⲓⲛ ⲁⲩⲱ ⲛⲑⲉ ⲛⲅⲏⲱⲛ ϩⲛ ⲛⲉϩⲟⲟⲩ ⲙⲡϫⲱⲱⲗⲉ 28 ⲙⲡⲉⲡϣⲟⲣⲡ ϫⲱⲕ ⲉⲉⲓⲙⲉ ⲉⲣⲟⲥ ⲁⲩⲱ ⲙⲡⲉⲡϩⲁⲉ ϩⲉⲧϩⲱⲧⲥ 29 ⲁⲛⲉⲥⲙⲉⲉⲩⲉ ⲅⲁⲣ ⲁϣⲁⲓ ⲉⲃⲟⲗ ϩⲛ ⲧⲉⲑⲁⲗⲁⲥⲥⲁ ⲁⲩⲱ ⲡⲉⲥϣⲟϫⲛⲉ ⲉⲃⲟⲗ ϩⲙ ⲡⲛⲟϭ ⲛⲛⲟⲩⲛ 30 ϫⲉ ⲁⲛⲟⲕ ⲉⲓⲟ ⲛⲑⲉ ⲛⲟⲩⲉⲓⲟⲟⲣ ⲉⲃⲟⲗ ϩⲛ ⲟⲩⲓⲉⲣⲟ ⲁⲩⲱ ⲛⲑⲉ ⲛⲟⲩϥⲟ ⲉⲥⲥⲱⲕ ⲉⲩϣⲛⲏ 31 ⲁⲓϫⲟⲟⲥ ϫⲉ ϯⲛⲁⲧⲥⲟ ⲙⲡⲁⲙⲁ ⲛⲟⲩⲟⲟⲧⲉ ⲁⲩⲱ ϯⲛⲁⲧⲥⲟ ⲙⲡⲁⲧⲗⲟⲙ ⲁⲩⲱ ⲉⲓⲥ ϩⲏⲏⲧⲉ ⲁⲡⲁⲉⲓⲟⲟⲣ ϣⲱⲡⲉ ⲛⲁⲓ ⲛⲉⲓⲉⲣⲟ ⲁⲩⲱ ⲁⲡⲁⲉⲓⲉⲣⲟ ϣⲱⲡⲉ ⲛⲁⲓ ⲛⲑⲁⲗⲁⲥⲥⲁ 32 ⲉⲧⲓ ϯⲛⲁⲟⲩⲉⲛϩⲧⲥⲟⲫⲓⲁ ⲉⲃⲟⲗ ⲛⲑⲉ ⲛϩⲧⲟⲟⲩⲉ ⲛⲧⲁⲟⲩⲟⲛϩⲟⲩ ⲉⲃⲟⲗ ⲉⲡⲟⲩⲉ 33 ⲉⲧⲓ ϯⲛⲁⲡⲉϩⲧⲧⲉⲥⲃⲱ ⲛⲑⲉ ⲛⲟⲩⲡⲣⲟⲫⲏⲧⲓⲁ ⲁⲩⲱ ⲛⲧⲁⲕⲁⲁⲥ ϣⲁ ⲛϫⲱⲙ ⲛϣⲁⲉⲛⲉϩ 34 ⲁⲛⲁⲩ ϫⲉ ⲛⲧⲁⲓϣⲡϩⲓⲥⲉ ⲛⲁⲓ ⲙⲁⲩⲁⲁⲧ ⲁⲛ ⲁⲗⲗⲁ ⲛⲟⲩⲟⲛ ⲛⲓⲙ ⲉⲧϣⲓⲛⲉ ⲛⲥⲱⲥ